Տուր ինձ սեր

Տուր ինձ սեր,

Երբ ես սիրո կարիք ունեմ:

Տուր ինձ դատողություն,

Երբ ես դրա կարիքն ունեմ,

Ու փորձիր հասկանալ`

Այս երկուսը հազվադեպ են հատվում

Իմ հարթության մեջ...

Ու անքնության մեջ 

Ձգվում են անվերջ ուղիղների պես`

Փոփոխվելով անդադար.

Աստիճան առ աստիճան,

Ամեն վայրկյան ու ակնթարթ...

Ու ստեղծում են քաոսը,

Որ բնական չէ, ցավոտ է շատ...

Տուր ինձ սեր...

Չափահաս

Չափահաս իմ սեր,

Որ կեսը կյանքիս 
Քեզ էիր վերցրել,
Ես սպասեցի, որ դու մեծանաս,
Որ քեզ սպանեմ` ինչպես կամենամ:

Չափահաս իմ ցավ,
Իմ գիտակցություն,
Որ այն մեղմը չէր,
Որից պարզապես տողերս հյուսեմ:

...Ու ես հերձեցի սերս չափահաս,
Հասկացա նրա խորքերը անծայր,
Թաղեցի մի տեղ,
Որ էլ չգտնեմ:

Չափահաս ցինիզմ...

Անտեր Սերս

Ես ու իմ սերը անտեր․․․
մնացինք խաչմերուկի կենտրոնում․․․
մեքենաների անկանոն ռիթմի մեջ․․․

ու սերս ցատկեց․․․
գրկեց քեզ որբ երեխայի պես․․․

Ուրախացա սիրուս համար,
բայց սաստեցի․․․

Օրենքներ ու իրավունքներ․․․
գրված ու չգրված․․․
Այդ դեպքում ինչպե՞ս պահեմ․․․․
Այսքան մեծ սերս․․․ 
սերս՝ անտեր․․․

02.09.2024

Երազել

Խեղդիր․․․․ սպանիր․․․
ու հետո տրորիր այնքան․․․ 
որ փոշիանա,
ու չտեսնի ոչ ոք․․․

վերցրու փոշին․․․
տար, փռիր քո այգում
հողի հետ,
հողի փոխարեն․․․
Ու թաքուն ընկղմիր ձեռքդ 
այդ անասելի փափուկ փոշու մեջ․․․
Աչքերդ՝ երկնքին հառած, բայց փակ,
Մինչև լուսաբաց
երազիր փոշու հորինված անցյալի մասին․․․
Երազիր չծնված երջանիկ պահերի մասին․․․

Չկախես գլուխդ երբեք․․․
Դու երազել ու սիրել գիտես․․․ 

02․09․2024

Հարազատ ցավ

․․․Պարտվեցի, բայց չգիտեմ, թե ով հաղթեց․․․

Ցավ կար․․․ արցունք կար, գուցե թաքնված․․․

Ամեն ինչ կար տառապելու համար,

Բայց ժամանակ չկար․․․

Ու անպետք մնաց ցավը հարազատ․․․

որբ մնաց․․․

անտեր մնաց․․․

հավերժ մնաց․․․

Աղոթում եմ

Փրկել ու փրկվել կուզեի..

Սավառնել լույսերում անհուն,

Հրեշտակներին մոտդ բերեի,

Մթությունը տանեի հեռու:

Նորից ժպիտով տեսնեի,

Լինեի հարազատ ու անկեղծ,

գիշերն ավարտվեր ստվերների...

Կուզեի ապրեիր, որ ապրեմ:

2024, Մայիս 28

Սեր

Ու հանկարծ զգացի,
որ այդ բառը այնքան օտար է դարձել ինձ․․․
Բառը, որ առաջ կարգախոսն էր կյանքիս,
Դարձել է գրքային մի սահմանում`
անցյալում թաղված․․․

Ու ուզում եմ՝
այս սիրտ ճմլող զգացողությունների մեջ ընկնեմ,
Որտեղ կա ինքը
կամ իր կիսատությունը․․․
Ամեն դեպքում
բոլոր բառերն ու ժեստերն իր մասին են․․․

Սեր․․․ սեր․․․ դարձիր իմը նորից․․․

2023, Դեկտեմբեր 28

Արի չթաքնվենք իրարից

Արի չթաքնվենք իրարից․․․
Գտիր ինձ աչքերիդ առաջ․․․
Գտիր ինձ սրտիդ մեջ․․
Գտիր ինձ ամենուր․․․

Գտիր ու գրկիր․․․

ու պտտվենք՝
խլացնելով աղմուկն աշխարհի․․․
Ու բաց չթողնենք երբեք,
որ հանկարծ չշպրտվենք նորից
այսքան հեռու․․․
այսքան երկար․․․
այսքան անժպիտ․․․

2024, Մայիս 14

 

Ցավը

Ցավը գալիս է մեկ-մեկ...

Մեկ-մեկ գալիս է հաճախ,

ստիպված եմ ընդունել նրան գրկաբաց..

Բայց ափերս ու ատամներս սեղմած...

Ժպիտով, 

որ պաշտպանում է ինձ աշխարհից,

Բայց ոչ ցավից,

Որ տարածվում է մարմնովս մեկ,

Փշաքաղվելու պես արագ...

Այսօր ինձ հետ էիր,

Ու ժպիտս էր այլ...

Ցավը այսօր կուչ էր եկել 

մի անկյունում դատարկ:

29.10.23

Սկիզբ

Արի պարենք նորից

ոչ մի բանից ծնված մեր պարը այն,

որ առաջին պատճառն էր

իրար գրկելու․․․

իրար գտնելու․․․

Արի պարենք նորից

մի նեղ ու անշուք սենյակում,

որ էմոցիաները մնան 

մեր շուրջը միայն․․

ու զգամ նորից թրթիռը,

որ անտեր է վաղուց․․․

Արի պարենք նորից․․․

Ճակատագրի ուղարկած մեր այն պարը․․․

որ առաջին պատճառն էր

իրար կորցնելու․․․

2024, March 26

Եկել էի քեզ մոտ

Եկել էի քեզ մոտ, որ գրկես․․․
Եկել էի, որ կարոտս թեթևացնես,
Եկել էի, որ չմոռանանք․․․ 

Նստել էիր՝ ժպիտդ բաց․․․
բայց ինձ գիրկ էր պետք մի ջերմ`
քոնը․․․ 

որ ներսս խաղաղվեր․․․

Ու փոթորկոտ եմ առ այսօր․․
Կարոտում եմ տունը մեր․․․
Փողոցներում այն փոշոտ․․․
ուր շատ հաճախ ենք սայթաքել․․․

2024, March 22

Կարոտ

Կարոտել եմ․․․

բարձը իմ․․

պատը իմ․․

պաստառները խամրած․․

կարոտել եմ

դռան ճռռոցն ու լուսամուտից լսվող 

աղմուկը երեխաների․․․

կարոտել եմ

լիությունը իմ բարբառի․․․

միշտ, անընդմեջ․․․

կուզեի ապրել գոնե մեկ օր

կրկին քաղցած,

բայց իմ Տան մեջ․․․

2024, Մարտի 20

Սիրտս

Սիրտս հույս է առել հիմա․․․
Ու դեպի քեզ բերող ճանապարհներ է գծում
քարտեզում իր մաշված ու քարտեզում մտքիս․․․

Սիրտս կորցրել է հիշողությունը․․․
Մասնակի․․․ 
Բաց է թողել վախերը բոլոր,
Որ ձգտումը դեպի քեզ չընդհատվի հանկարծ․․․

Սիրտս ավելի խաղաղ է հիմա․․․
երբ 10000 կիլոմետրը դարձավ 10000 մետր․․․
հետո ինչ, որ հիմա նույնպես չեմ տեսնում քեզ․․․ 

Սիրտս գիտի, որ ուրիշինն ես, բայց իմն ես,
հավատում է խոստումներին բոլոր՝
Ավտոբուսում ասված կամ ավտոբուսից դուրս․․․

Սիրտս չի խանդում քեզ․․․
Միամիտ է սիրտս․․․ 

Երեխա է՝ անզոր, անօգնական․․․
Սիրում է սիրտս․․․

Unconditional

I love the happiness of your eyes

Every time you look at me.

I love the sadness of your eyes

when I have no time for you, I'm sorry..

I love your love to me..

Unconditional..

~~~~~~~~~~~~~~~~~~~~~~~~~~~~~

Սիրում եմ երջանկությունը քո

Ամեն անգամ, երբ տեսնում ես ինձ,

Սիրում եմ տխրությունը քո,

Երբ չունեմ ժամանակ քեզ համար:

Սիրում եմ սերը քո`

Մեծ ու առանց նախապայմանների:

18.12.2023